Ana səhifə

Bakı aeroportu ac sərnişinlərə görə məsuliyyəti britaniyalıların üzərinə qoydu

    Tarix: 13-12-2017 21:53   
Bakı aeroportu ac sərnişinlərə görə məsuliyyəti britaniyalıların üzərinə qoydu
Heydər Əliyev Beynəlxalq aeroportundan Bakıda məcburi eniş etmiş Mumbay-London reysi sərnişinlərinin ittihamlarına cavab verilib. Xatırladaq ki, “British Airways” şirkətinin təyyarəsi ilə uçmuş sərnişinlər xarici KİV-ə verdikləri müsahibədə Bakı aeroportunda rastlaşdıqları laqeyd münasibətdən şikayətləniblər.

Virtualaz.org-un xahişi ilə baş verənləri şərh edərkən Heydər Əliyev Beynəlxalq aeroportunda bildiriblər ki, beynəlxalq təcrübəyə əsasən, reyslərin ləngiməsi və ya qəzalı enişlər zamanı aeroportlara xidmətlər haqda sifarişlər yalnız aviaşirkətlər, indiki halda British Airways tərəfindən, edilir.

"Bakıda məcburi enişdən dərhal sonra Heydər Əliyev Beynəlxalq aeroportu reysin sərnişinlərinə xidmətlərin bütün spektrini - isti qidalanmadan mehmanxanada yerləşdirməyə qədər, göstərmək üçün hazır idi. Beləliklə, sərnişinlərin Bakı aeroportunun tranzit zonasında yerləşdirilməsi haqqında qərar “British Airways” aviaşirkəti tərəfindən qəbul edilmişdi, yükü boşaltmağa da Britaniya aviaşirkətinin kapitanı icazə vermədi", - deyə aeroportun mətbuat xidmətindən qeyd ediblər.

Bundan başqa, AZAL Qapalı Səhmdar Cəmiyyətinin rəhbərliyi qabaqcadan Azərbaycanın Xarici İşlər Nazirliyi, Heydər Əliyev Beynəlxalq aeroportunun rəhbərliyi isə Böyük Britaniya səfirliyinin konsulluğu ilə “British Airways” şirkətinin müraciət edəcəyi təqdirdə reysin sərnişinlərinin mehmanxanada yerləşdiriləcəyi barədə danışıqlar aparmışdılar. Ancaq aviaşirkət tərəfindən belə müraciət edilməyib. O da maraqlıdır ki, “British Airways” təyyarəsinin ekipajı özü Bakı mehmanxanalarından birində qalmağa qərar verib.

"Sərnişinlərə yalnız sendviç və səhər yeməyinin verilməsi haqda sorğu da, həmçinin Britaniya aviaşirkətinin təşəbbüs ilə edilmişdi", - deyə xəbərdə vurğulanıb.

***17:57

Xəbər verildiyi kimi iki gün əvvəl “Britihs Airways” hava yolları şirkətinin Hindistanın Mumbay şəhərindən Londona uçan təyyarəsi birinci sinif salonda tüstülənmə səbəbindən Bakıya məcburi eniş edib. Təyyarədə yaranmış texniki nasazlıq səbəbindən sərnişinlər şirkətin başqa təyyarəsi ilə mənzil başına yola salınıblar.

Virtualaz.org xəbər verir ki, “The Times of İndia” qəzeti bu reysin sərnişinlərinin Bakı aeroportunda üzləşdikləri problemlər barədə yazıb. Sərnişinlərin arasında Hindistan Dövlət Bankının (State Bank of İndia-SBİ) keçmiş sədri Arundhati Bhattaçarya da olub. O, danışıb ki, təyyarə aeroporta məcburi eniş edəndən sonra sərnişinlərin öz yüklərinə çıxış imkanları verilməyib. Bu da xüsusən müalicə alan və dərmanlarını özləri ilə daşıyan sərnişinlərə problem yaradıb.

“Mən yanımda üç dərman gəzdirirəm, hansı ki, bunları şəkərli diabet, arterial təzyiq və mədəaltı vəzinin xəstəliyinə görə içməliyəm. Lakin mənə dərmanları götürmək icazəsi vermədilər”-birinci salon sərnişinlərindən Mukeş Talrey deyib.



Habelə sərnişinlərə səhər yeməyini də düz-əməlli verməyiblər, onlardan bəzilərinə omlet paylamaqla kifayətləniblər. Sərnişinlər qısamüddətli viza ilə təmin edilmədiyindən aeroportu tərk edə bilməyiblər, habelə Bakı aeroportunun işçilərinin əksəriyyətinin ingilis dilini bilmədiyi üzə çıxıb. “British Airways” şirkəti sərnişinlərə 3 saat ərzində təyyarədəki texniki nasazlığın aradan qaldırılacağını bildirsə də ləngimə xeyli uzun çəkib.

Bhattaçarya qəzetə açıqlamasında bildirib ki, təyyarə axşam saat 9-da aeroporta məcburi enib. Və onlar aeroportun gözləmə salonunda, yerdə yatmalı olublar. Mühəndislər təyyarədəki texniki nasazlığı aradan qaldırsalar da reysə davam etmək mümkün olmayıb. Çünki ekipaj üzvləri 12 saatlıq iş növbəsini başa vurmuşdular. Bu ilin oktyabrında Hindistanın ən böyük bankının sədrliyindən pensiyaya çıxan Bhattaçarya deyib ki, salonda tüstülənmə və kəskin iy nəticəsində təyyarə məcburi eniş edib.



Sərnişinlərdən Mukeş Talrey deyib ki, təyyarə Mumbay aeroportundan 4 saat gecikmə ilə havaya qalxmışdı. “Təxminən 4 saatlıq uçuşdan sonra monitorlar söndü, oturacaqların tənzimlənməsi funksiyası işləmədi və məcburi eniş barədə elan verildi”-o deyir.

Təyyarə Bakıya enəndən sonra sərnişinlərə iki saat göyərtədən çıxmağa icazə verməyiblər. 11.30-da sərnişinlərə aeroportun tranzit zalına keçməyə icazə verilib. Gecə 1.30-da sərnişinlər təyyarəyə geri qaytarılıblar, ancaq 4.50-də onlardan xahiş edilib ki, təkrarən tranzit salonuna qayıtsınlar. Çünki Beyrutdan yeni təyyarənin gəlişinə qədər daha 8 saat gözləmək lazım gələcək. Sərnişinlər aviaşirkət tərəfindən qısamüddətli viza və otellə təmin edilməyiblər. Beləliklə, 20 saat ləngimədən sonra sərnişinlər Bakı aeroportunu tərk edərək Londona uçublar.

Virtualaz.org

Ən çox oxunanlar

Reklam
azza

Xəbər lenti
Sayğac
Baş Redaktor: Azər Talıbov      
Bizimlə Əlaqə : Tel - (050) 378 66 61       E-mail : [email protected]
Məlumat internet səhifələrində istifadə edildikdə müvafiq keçidin qoyulması mütləqdir.

Anaxeber.az © 2014
Designed by: Daraaz.net